Die rede

Wie was ek gewees
Waar het ek gedwaal
Toe donkerte en vrees
Soos golwe in my maal

Aasvoëls het gehap
Ek het ophou leef
Toe jy my binnestap
Toe ons begin verweef

Mensheid in jou siel
Skoonheid in gelaat
Geloof in elke woord
God in elke daad

Jou hand oop, uitgestrek
Jou hart skaam en alleen
Bereid om te ontdek
Afwagtend vir die een

Versigtig oop jou deur
Gewillig oop jou hart
Met deernis vir my seer
Verlos jy my van smart

Ware vriendskap blom
My lewe begin nuut
Deur strawwe ure om
Word jy my nuwe lied

My hart en siel en vlees
Versterk weer in jou lig
Waar eens ek niks kon lees
Verskyn opnuut gedig

In antwoord op gebede
Voorsien Hy jou as rede
Vir verlossing van verlede
En genade in die hede

Op die drumpel van geluk
Staan ek nakend onverbind
Ek bied jou liefde aan
Soos die liefde vir 'n kind

Wie was ek gewees
Waarheen sou ek daal
Toe jy my kom genees
Toe jou liefde my kom haal

Dankie